ZURE MATXISMOA AZTERTU

Gizon, zure matxismoa aztertzeko galdera-sorta bat duzu hemen. Interesgarria da zer-nolako gizona zaren jakitea. Zure matxismo-maila ikusi nahi baduzu, markatu erantzunak borobil batekin, batu puntuak eta, gero, irakurri galderen atzealdean dauden deskribapenak.

Adi! Test honek ez du baliorik edukiko ez bada fidagarritasun-irizpidea aplikatzen; hau da, emakume batek edo bikotekideak alderatu behar du.

(Jerezeko Udalaren "Berdintasunaren aldeko gizonak" programaren barruko Aztertu zure matxismoa testean dago oinarrituta galdera-sorta hau. Eskerrak eman nahi dizkiegu, erabiltzen uzteagatik.)

1.- OSTIRAL ARRATSALDEAN ESKOLAN IKASTEN ZUENEKO LAGUNEKIN AFALTZERA JOATEKO GERATU DELA ESAN DIZU BIKOTEKIDEAK. ZER EGINGO DUZU?

Aukera ezazu hauetako bat

Egun horretan bertan berarekin afaltzera joatea pentsatua zenuela iradokitzen diozu, eta beste baterako utz dezala lagunekin duen plana.
Joatea debekatzen diozu. Ez duzu gustuko beste batzuekin atera dadila. Maite bazaitu, ez du beste inorekin atera behar.
Ondo dagoela esaten diozu, dibertitu dadila, eta zure planak egingo dituzula.
Oso ondo pasatzeko esaten diozu, baina behin eta berriz gogorarazten diozu oso aspertuta eta oso bakarrik egongo zarela eta asko sufrituko duzula bera gabe.
Jatetxe horretako jakiak transgenikoak direlako zurrumurruak daudela esaten diozu, higiene-baldintzak oso txarrak direla, eta, are, langileak erdi esklabotasun-baldintzetan daudela, eta esplotazio-sistema horrekin bat egitea leporatzen diozu.

2.- ZURE NAGUSI BERRIA EMAKUMEA DA. NOLA ERANTZUNGO DUZU?

Aukera ezazu hauetako bat

Sumindu egiten zara, emakumeak agintzeko ez daudela, sentiberegiak direla eta negarrez amaitzen dutela uste duzulako. Seguru feminista goranahi bat dela.
Gizon bat baino sentikorragoa izango dela pentsatzen duzu, maitasun handiagoz tratatuko zaituela eta gauza gutxiago zuzenduko dizkizula.
Nahiago duzu. Inoiz ez da emakume bat egon postu horretan, eta lanari emango dion ikuspegia positiboa izan daitekeela uste duzu.
Bikain. Eskarmentu eta beteranotasun handiko gizona zarela uste duzu. Ziur hori balioesten jakingo duela.
Morboa sentitzen duzu. Polita bada, berarekin ligatzen saiatuko zara, eta, polita ez bada, hala izatearen itxurak egingo dituzu, lausengatua senti dadin.

3.- EMAKUME BATEK EZEZKOA EMATEN DIONEAN SEXU-HARREMANAK EDUKITZEARI, ZER ESAN NAHI DU?

Aukera ezazu hauetako bat

Gauzak ondo doaz; probatzen jarraitu behar dut. Horiexek dira gustatzen zaizkidanak, eutsi arren nirekin oheratu nahi dutenak.
Ziur lesbiana dela eta gizonezkoei barre egiteko ibili dela ni berotzen, gorrotatu egiten gaituzte-eta.
Ekin eta ekin jarraitzen duzu; emakumeen "ezezkoa" beti da "agian". Eduki duen hezkuntza tradizionalarengatik esan dizu ezetz, eta zu bezalako gizona behar du errepresioez libratzeko.
Ezetz esan du, eta nahikoa da hori. Ez daukat inolako azalpenik eskatzeko eskubiderik.
Benetan maiteko bazintu, ez luke hainbeste zalantza edukiko. Gero, katutxoek bezala hasiko zara negar-zotinka, eta prest egon arte itxarongo diozula esango diozu.

4.- ZURE USTEZ OSO PROBOKATZAILEA DEN ARROPA JANTZI DU BIKOTEKIDEAK, ZER EGINGO DUZU?

Aukera ezazu hauetako bat

Hor zehar tipo lizun asko dagoela esaten diozu, eta arropa horrekin joanez gero etengabe gogaitaraziko dutela, eta, beraz, bere hobe beharrez, hobe duela arropa diskretuagoa jantzi.
Bere erruz kalean begiratzen dioten guztiekin borrokatu beste aukerarik edukiko ez duzula ohartarazten diozu.
Nahi duena jantz dezala. Argi daukazu zuri gustatzen bazaizu beste batzuei ere gustatuko zaiela.
Norbaitek zerbait esaten badio bere erruagatik izango dela uste duzu, arropatxo horrekin edozein berotzea baita normalena. Sakonean, probokatzea eta amodio-aferak bilatzea gustatzen zaio.
Asko maite duzula aitortzen diozu, eta bera galtzeko arriskua sentitzen duzula hain erakargarri janzten denean. Hala ere, arropa hori zugan pentsatuz jantzi izana eskertzen diozu, eta esaten diozu izugarri gustatuko litzaizukeela itsasertzean biok bakarrik goxo-goxo zaudetela afaltzeko gordetzea.

5.- LANEAN HOBETZEKO AUKERA ESKAINI DIOTE BIKOTEKIDEARI, BAINA ZUREKIN EGOTEKO ETA ETXEKO LANAK EGITEKO DENBORA GUTXIAGO EDUKITZEA EKARRIKO DIO HORREK. ZER EGINGO DUZU?

Aukera ezazu hauetako bat

Onartzen badu zure zaletasunei (eta lagunekin futbolean jokatzeari) eskaintzen diezun denbora galdu izanaren erruduna izango dela esaten diozu.
Bere erabakia da, eta laguntzeko egon behar duzu hor.
Beharrezkoa ez den erabakia dela erantzuten diozu; izan ere, zuk mantendu dezakezu familia ekonomikoki. Hortaz, ez du horrelako nahas-masetan sartu beharrik, zurekin ez baitzaio ezer faltako.
Lehenengo, ados zaudela erakusten duzu, baina, gero, ez duzu etxeko lanetan ez laguntzen, ez parte hartzen, eta lanean hasi denetik gauzak ondo ez daudela aurpegiratzen diozu.
Bere inizialak dituen maletatxoa oparitzen diozu, eta ederki iruditzen zaizula esaten, betiere, hainbeste gustatzen zaizun arroz-esne hori egiteari uzten ez badio. Gainera, ospakizun baterako eta pasiozko gau baterako aitzakia ona da.

6.- EKONOMIARI BURUZKO DEBATE-SAIO BAT ARI ZARA IKUSTEN, ETA, BERTAN, LAU EMAKUME ETA GIZON BAT ARI DIRA PARTE HARTZEN. ZER EGINGO DUZU?

Aukera ezazu hauetako bat

Asko harritzen zaitu debate serio batean hainbeste emakume egoteak. Nabari da kuota parekideak zorrotz aplikatzen direla.
Sumindu egiten zara. Non dago parekidetasuna hor?
Adi-adi entzuten duzu. Bereziki, gizonak esaten duena, emakumeak etxeko ekonomiarekin oso ondo moldatu bai baina zifra handiekin galdu egiten baitira. Ez dute makroekonomiaz hitz egiteko balio.
Kanala aldatzen duzu; izan ere, ziur lauren artean ez diotela gizonari txintik ere esaten utziko.
Adi jarraitzen diozu debateari, emakumeen ikuspegiak eman dezakeen ikuskera berria entzun nahi duzulako.

7.- EMAKUME BATEK MATXISTA ZARELA ESAN DIZU. ZER EGINGO DUZU?

Aukera ezazu hauetako bat

Entzun egiten diozu, eta horri buruz hausnartu.
Berarekin haserretzen zara, ez baitzaitu hori esateko adina ezagutzen. Kokotetik gora eginda zaude gauzak orokortzearekin eta gizonek esaten dutena beti lupaz begiratzearekin.
Beharbada egia dela erantzuten diozu, eta eman dizuten hezkuntza matxistari egozten diozu, baina matxismoak zuri ere sufriarazi eta kalte egiten dizula.
Histerikoa eta ozpin hutsa dela esaten diozu.
Maite duen gizonik topatzen ez duela esaten diozu, eta horixe dela bere arazoa. Txortaldi on bat falta zaiola.

8.- ZURE LANTOKIAN EDO IKASKETA-ZENTROAN, SEXU-JAZARPENAREN ETA SEXUAGATIKO JAZARPENAREN AURKAKO PROTOKOLO BAT ABIATU DA. ZER EGINGO DUZU?

Aukera ezazu hauetako bat

Alde zaude, oraindik ere matxismo asko dagoelako; zure inguruan eta lankideengan/ikaskideengan egiazta dezakezu egunero. Hala ere, ez da zure kasua.
Ekimena txalotzen duzu. Horrelakorik gertatuz gero edo norbait egoera horretan dagoela jakinez gero, beti da ona nola jokatu eta nora joan jakitea.
Samindu egiten zara. Ez duzu beharrezko ikusten inolako protokolorik abiatzea, zuk dakizula ez baita inoiz horrelakorik jazo. Emakumeentzat, ordea, gizon guztiok gara susmagarriak eta jazarle potentzialak.
Ez duzu ulertzen benda zauritu aurretik jartzeko premia hori. Protokolo horiek ezertarako balio ez duten teoriak dira. Kasuren bat gertatzen bada, orduan egingo da zerbait.
Lotsatu egiten zara, kezkatu egiten zaituelako zure lagunak enteratzeak eta, zure inguruan mota horretako arazoak egon daitezkeela jakitean, zure eta zure kideen gaineko susmoa edukitzeak.

9.- HAURTXOA NEGARREZ ARI DA GAUERDIAN. ZER EGINGO DUZU?

Aukera ezazu hauetako bat

Ez duzu entzuten, ozenago egiten baituzu zurrunga.
Bikotekidea esnatzen duzu, abisatzeko, oso nekatuta baitzaude: egun osoa eman duzu lanean, eta, gainera, oso egun gogorra izango da biharkoa.
Altxatu egiten zara. Hori da egin dezakezun gutxienekoa, berak bederatzi hilabetez barruan eraman zuela kontuan hartuta.
Txanpon bat botatzen duzu, arreta ematera nork joan behar duen ikusteko.
Negarrez uzten duzu eta lo plantak egin. Nekatuko da, edo bikotekidea esnatuko da, emakumeek esku hobea baitute haurrekin.

10.- LANKIDE (GIZON) BATEK BI URTEKO BAIMENA ESKATU DU GAIXORIK DUEN AMA ZAINTZEKO. ZEIN IRITZI DUZU?

Aukera ezazu hauetako bat

Denbora asko dela gizon baten pazientziarako. Emakumeek askoz ere hobeto egiten dute; ohituago daude, eta errazago uztar dezakete beren betebeharrekin.
Egokia litzateke egoitza batera eraman dezala aholkatzea. Gizonok ez dugu horretarako trebetasunik, eta hobe da profesionalen esku uztea.
Gizon gizajoak ez daukala arrebarik. Eta, baldin badauzka, lotsa gutxi dutela.
Gizonezkook ere zainketa-lanak egin ahal eta egin behar ditugu. Onartzea kostatzen zaigun erantzukizun-kontu bat besterik ez da.
Enpresan gora egiteko edo hobetzeko aukera guztiak galduko dituela eta kalean amai dezakeela. Hori normala da emakumeei haurrak edukitzean gertatzea, baina horiek ez dute beste aukerarik izaten.

11.- ZURE HIRIKO JAIETAN SEXU-ERASO BAT SALATU DUTELA IRAKURRI DUZU EGUNKARIAN. ZER PENTSATUKO DUZU?

Aukera ezazu hauetako bat

Hori gertatzea ohikoa bada festetan ere gertatzea dela normalena. Jendeak asko edaten du, denetarik hartzen du, eta gero ezin du bere burua kontrolatu.
Arazoa ez dela festaren kontrolik eza; hau da, gizon askok uste dute egiten den hori ligatzea dela, eta ez erasotzea, eta egiteko eskubidea dutela.
Izugarria dela. Baina neska nola zegoen jakin beharko litzatekeela, emakume asko limurtzen hasten baitira eta, gero, ajearekin, ez baitute gogoratu ere egiten beraiek eragin dutela.
Lotsa sentitzen duzu. Hori orban handia da zure hiriko jaietarako, eta ospea, bisitari-kopurua eta giroa murriztuko ditu.
Elkarretaratzera joango zarela besterik sortzen ez bazaizu, festetan konpromiso asko egoten da-eta.

12.- BERDINTASUNARI ETA MASKULINITATEARI BURUZKO PRESTAKUNTZA-SAIO BATERA JOAN BEHAR DUZULA JAKINARAZI DIZUTE ENPRESAN. ZER EGINGO DUZU?

Aukera ezazu hauetako bat

Edozein aitzakia jarri. Baina, ezin bazaitezke libratu, joan. Orduak ordaintzen dizkizuten bitartean, ez dizu axola.
Primerakoa iruditzen zaizu, berdintasunaren inguruko hori oso ondo dagoelako. Hala ere, zurekin denbora-galera izango da, dagoeneko berdintasunaren aldekoa eta oso maskulinoa baitzara.
Baja eskatu.
Entzuteko eta ikasteko aukera dela uste duzu. Litekeena da orain arte pentsatu ez duzun zerbaitekin konturatzea.
Sumindu. Lantokia ez da doktrinatzeko lekua. Hobe prebentzioari eta laneko arriskuei buruzko ikastaroa egingo balute.

13.- LAGUN BATEK TXISTE MATXISTA BAT KONTATU DIZU. ZER EGINGO DUZU?

Aukera ezazu hauetako bat

Barre egiten duzu, eta are matxistagoa den beste bat kontatu.
Barre egiten duzu, baina pixka bat pasatu dela esaten diozu.
"Feministatzat" jotzen duzun bat kontatzen diozu.
Alde egiten duzu, aho bete hortz utzita.
Beste lagun batengana joango zara txistea kontatzera.